Fréttir

Enn slæðast gestir á sýninguna

Þrátt fyrir að ferðamannatímabilið sé opinberlega lokið á stórum hluta landsins þá slæðast enn gestir á Galdrasafnið á Hólmavík. Síðbúnir ferðamenn eiga leið um Strandir á þessum árstíma og njóta þess sem haustið hefur upp á að bjóða. Galdrasýningin er opin þeim og öllum öðrum sem hafa áhuga á að líta við í heimsókn. Fólki er velkomið að fá sýninguna opnaða, en símanúmer er á plakati við dyrnar til hvatningar til þeirra sem eiga leið um svæðið.

Sænska sjónvarpið tekur upp efni á galdrasýningunni

Þriðja tákniðSænska sjónvarpið var nýverið á Hólmavík við upptökur á sjónvarpsþætti um íslenskar bókmenntir sem verður sýndur í sænska ríkissjónvarpinu í desember. Þar var tekið var viðtal við Yrsu Sigurðardóttur rithöfund en hún skrifaði skáldsöguna Þriðja táknið fyrir síðustu jól. Galdrasýning á Ströndum kemur nokkuð við sögu í bókinni. Að sögn sænsku sjónvarpsmannana kom aldrei annað til greina en að taka viðtalið við Yrsu á Hólmavík og tengja sýninguna inn í þáttinn. Þriðja táknið hefur verið þýdd yfir á fjögur tungumál og þar á meðal sænsku. Í þættinum kemur einnig fram galdramaður af Ströndum sem kennir Svíum m.a. að verja sig gegn ósannsögli stjórnmálamanna. Sænska sjónvarpið sendi fimm manna tökulið til Íslands að taka viðtöl við nokkra vel kunna íslenska rithöfunda og ferðin til Hólmavíkur voru einu kynni þeirra af landsbyggðinni.

Lesa meira...

Er hvalur á firðinum?

Í tengslum við fornleifauppgröft á hvalveiðistöð baskneskra hvalveiðimanna í Hveravík við Steingrímsfjörð sem Strandagaldur er þátttakandi í, er stefnt að því að Steingrímsfjörður verði Mekka hvalaskoðunar úr landi á Íslandi. Til þess að svo megi vera þarf að skrásetja hvalakomur í Steingrímsfjörð og reyna að sjá nokkuð nákvæmlega hvar og hvenær árs er helst von til þess að sjá hvali á firðinum. Haldin verður skrá um hvalakomur og reynt að átta sig á því á hvaða árstíma er helst von til að berja þessi risaspendýr augum. Sjómenn eru sérstaklega beðnir um að hafa augun hjá sér og tilkynna um hvalaferðir á firðinum.

Vonir standa til að í framtíðinni verði hægt að markaðssetja Steingrímsfjörð sem ákjósanlegan stað til hvalaskoðunar og náttúruskoðunar af landi og stefnt er að því að setja upp öfluga sjónauka á nokkrum vel völdum stöðum sitthvorum megin við fjörðinn.  Vonast er til þess að íbúar við Steingrímsfjörð taki virkan þátt í þessu verkefni og tilkynni hvalakomur í gegnum tilkynningarformið.

Gert er ráð fyrir því að þessar rannsóknir standi yfir í þrjú til fjögur ár og allar ljósmyndir af hvölum í Steingrímsfirði eru vel þegnar. Hér á vinstri hönd er að finna tengil inn á tilkynningarsíðuna, Er hvalur á firðinum?, og upplýsingarnar berast þaðan í tölvupósthólf Strandagaldurs.

Image
Sjáendur hvala við Steingrímsfjörð eru m.a. beðnir um að fylla út á hvaða ofangreindu svæði á firðinum þeir urðu hvala varir

Verslun Strandagaldurs fær Tax Free merki

ImageStrandagaldur hefur gert samning við Iceland Refund sem varðar endurgreiðslu á virðisaukaskatti til erlendra ferðamanna sem versla í minjagripabúðum Galdrasýningar á Ströndum. Hér eftir geta því gestir sýningarinnar sem eru með fasta búsetu erlendis fengið hluta af virðisaukaskattinum endurgreiddan áður en þeir yfirgefa landið. Að sögn Sigurðar Atlasonar þá er þetta hluti af því að efla minjagripasölu Strandagaldurs enn frekar og að hans sögn þá styrkir samningurinn samkeppnisaðstöðu Strandagaldurs verulega þar sem önnur minjagripasala á Hólmavík þarf ekki að gera skil á virðisaukaskatti og getur því sparað álagningu verulega.

Lágmarksverslun til að njóta þessara fríðinda er 4000 krónur og fær viðkomandi í hendur ávísun sem er síðan framvísað til endurgreiðslu í Leifsstöð eða öðrum útborgunarstöðvum Iceland Refund á Íslandi. Ferðamaðurinn fær ca. 15% endurgreitt eða um 600 krónur ef verslað er fyrir 4000 krónur. Mismunurinn er þóknun sem skiptist á milli verslunar, bankastofnana og endurgreiðsluaðilans.


Breyttur opnunartími Kotbýlis kuklarans

Opnunartími Kotbýlis kuklarans á Klúku í Bjarnarfirði breytist þann 16. ágúst og verður frá kl. 12:00 - 18:00 alla daga fram til mánaðarmóta. Hátt í tvö þúsund gestir á öllum aldri og mörgum þjóðernum hafa komið í kotbýlið í sumar. Framundan er að bæta þjónustuaðstöðuna til muna á svæðinu með byggingu sérstaks þjónustuhúss næsta sumar. Þar verður öll aðstaða betri og meiri en hægt er að bjóða upp á í bráðbirgðaskúrnum sem er þar í dag. Ætlunin er að opna þar litla veitingasölu sem gestir á ferð um Bjarnarfjörð geta nýtt sér ásamt gestum sundlaugarinnar og tengja hana við starfsemi Strandagaldurs á svæðinu. Sundlaugin á Laugarhóli er áfram opin alla daga frá morgni til kvölds, nema seinnipart þriðjudaga, en þá er hún ætíð tæmd og þrifin.

Galdramaðurinn í kotbýlinu
Galdramaðurinn í kotbýlinu

Fleiri greinar...

JPAGE_CURRENT_OF_TOTAL

10