Image Það stefnir í dágott útgáfuár hjá Strandagaldri í ár en nýverið kom út bókin Tvær galdraskræður sem Magnús Rafnsson tók saman. Nú er komin út bók sem Már Jónsson sagnfræðingur tók saman og heitir Galdrar og siðferði í Strandasýslu á síðari hluta 17. aldar. Bókin er í kiljuformi og telur 202 blaðsíður og fæst að sjálfsögðu á Galdrasýningu á Ströndum og sölubúð hennar á vefnum með því að smella hér. Bókin er einnig fáanleg í Minja- og handverkshúsinu Kört í Trékyllisvík. Í bókinni er einnig að finna enskan úrdrátt sem skrifaður er af Magnúsi Rafnssyni.

Á baksíðu bókarinnar segir að Strandamenn stæri sig á góðum stundum af því að kunna meira fyrir sér í göldrum en aðrir Íslendingar, ekki síst á þeim forsendum að í sýslunni urðu sum mögnuðustu galdramál 17. aldrar. Í bókinni birtast varðveittir dómar í þeim málum í fyrsta sinn á prenti og sýna hugarheim og lífskjör alþýðumanna í kuldalegu ljósi ásakana um hrekki og ofsóknir, sem sakborningar tóku sjálfir mark á og notuðu sér til framdráttar í harðri lífsbaráttu.