Rannsakar ýmis fræði í Köben

ImageMagnús Rafnsson sagnfræðingur á Bakka í Barnarfirði situr nú í kóngsins Kaupinhöfn og nýtur þess að hafa fengið styrk til fræðistarfa frá Den Arnamagneanske Commission. Magnús hefur notað tímann til að leita frekari upplýsinga um galdraskræðurnar sem MA-ritgerð hans við Háskóla Íslands fjallaði um. Ekki segist hann hafa rekist á neitt alveg óvænt en samt sé alltaf öðruvísi að skoða handritin sjálf en að byggja á lýsingum annara. Stór hluti af handritunum er reyndar kominn til Íslands en sitthvað merkilegt er þó enn í Kaupmannahöfn sem alþýðumenn settu á blað á fyrri öldum.

Hvalveiðarnar á sautjándu öld eru að sjálfsögðu einnig ofarlega í huga Magnúsar og þá er bókasafn Árnastofnunar í háskólabyggingunum við Njálsgötu á Amager ekki amaleg náma til að leita í bókum um íslenska sögu og menningu þótt rannsóknir á fornritunum hafi alla tíð verið efst á baugi hjá stofnuninni. Enn er samt furðulegt hvað hvalveiðar útlendinga á Ströndum eru fyrirferðalitlar í heimildum. Samt virðist alveg á hreinu að á meðan verslun við útlendinga var harðbönnuð hefur launverslun verið stunduð víða á Ströndum og heimamönnum ekki þótt það tiltökumál.

Árnasafn er ekki eini staðurinn sem Magnús hefur setið á því á Konunglega bókasafninu er einnig töluvert af íslenskum handritum. Þar er hann nú að skoða teikningar sem gerðar voru á áttunda tug 18. aldar þegar Ólafur Ólavius var að leita hentugum stöðum til að reisa hafnir. Olavius gerði riss af þessum stöðum og eftir þeim teiknaði Sæmundur Hólm síðan kort af Hólmarifsvík, eins og hún hét þá, Skeljavík og Reykjavík, sem nú heitir Hveravík. Á kortinu af Hólmarifsvík eru merktar inn tóftir þar sem sýslumannsbústaðurinn er nú og spottakorn þaðan leifar af völundarhúsi sem Ólafur Olavius lýsti í ferðabók sinni. Á morgun þann 20. nóvember mun Magnús svo flytja fyrirlestur í stofnuninni um Strandir, Galdrasýninguna, rannsóknir sínar á galdrabókum og fornleifauppgröftinn á Strákatanga.

Mailing list